Өнөөдөр Шинэ Зеландын Кристчөрч хотын төвд орших Исламын шашны Мажид Аль Нур сүмд зэвсэгт этгээд халдлага үйлдэж, олон хүний амь үрэгдсэн байна.

Орон нутгийн цагаар 13:30 цагийн үед Баасан гарагийн мөргөл үйлдэхээр олон хүн сүмд ирээд байхад энэхүү халдлага гарчээ. Сүмийн гадна 20 орчим эмнэлгийн машин ирээд байгаагаас харвал хохирлын хэмжээ их байгаа бололтой.

Хотын бүх сургуулийг хааж, харуул хамгаалалтыг чангатгасан талаар цагдаагийн газар мэдээлжээ. Шинэ Зеландын ерөнхий сайд Жасинда Ардерн уг хэргийг “урьд өмнө үзэгдээгүй хүчирхийлэл” хэмээн нэрлэж өнөөдрийг Шинэ Зеландын хамгийн хар бараан өдрүүдийн нэг боллоо гэж мэдэгдсэн байна.

Гэрчүүдийн мэдээлснээр цэргийн хээрийн хувцастай, автомат буутай эрэгтэй сүмд орж ирээд гал нээсэн гэнэ. Сүм дотор хаа сайгүй цус урсаж, алагдсан хүмүүсийн цогцос олноор хэвтэж байсныг зарим нь гэрчилжээ.

Одоогоор хохирлын хэмжээг зарлаагүй байгаа бөгөөд албан ёсны хэвлэлийн хурлыг Улаанбаатарын цагаар 12:00 цагт зарласан байна.

Шинэ Зеланд нь гэмт хэрэг бага гардаг, тайван амгалангаараа алдартай улс юм.

Эх сурвалж: Reuters