2016 оны NBA-ын аварга, 5 удаагийн бүх одод Кэвин Лав улирлын эхний дөрвөн тоглолтод оролцсоныхоо дараа гэмтэл авч одоог хүртэл талбайд гараагүй байгаа билээ. Тэгвэл сүүлд гарсан мэдээллээр талбайд эргэж гарахад дахиад хэдэн долоо хоног шаардлагатай гэнэ.

Кэвин Лав сүүлийн гурван улиралд дор хаяж 20 тоглолт өнжиж байгаа бөгөөд нийт 11 улирлын ердөө 5 улиралд нь л 60 болон түүнээс дээш тоглолтод оролцоод байна.

Гэмтлийнхээ талаар хэлэхдээ, “Би хэзээ талбайд гарахаа сайн мэдэхгүй байна. Хэзээ нэгийн эсрэг нэг, хоёрын эсрэг хоёр, гурвын эсрэг гурав бэлтгэлд оролцохоо ч сайн мэдэхгүй байна. Удахгүй бэлтгэлээ хийгээд эхэлнэ гэдэгт итгэж байгаа. Талбайд гарахыг тэсэн ядан хүлээж байна” гэжээ.

Өнгөрсөн улиралд 59 тоглолтод оролцож 17.6 оноо, 9.3 самбар, 45.8%-тай довтолж, холын шидэлтийг 41.5%-тай шидсэн тэрээр энэ улиралд дөрвөн тоглолтод оролцохдоо 19.0 оноо, 13.5 самбар дунджилсан юм.

Одоогоор Кливлэнд Кавалиэрс баг 40 тоглолт хийсэн бөгөөд 8 хожиж 32 хожигдсон гэсэн тааруу үзүүлэлтээр Дорнод бүсийн хамгийн сүүлийн байранд бичигдэж байна.