Дэлхийн хоёрдугаар дайны тухай Хятадын уран бүтээлчдийн хийсэн “Air Strike” киног дэлгэцэнд гаргахыг Хятадын эрх баригчид хориглосон нь тус кинонд дүр бүтээсэн жүжигчин эмэгтэй Фан Бинбиний татварын хэрэгтэй холбоотой бололтой.

Холливүүдын одод болох Брюс Уиллис, Адриен Броди нар уг киноны гол дүрүүдэд тогложээ.

36 настай Хятадын дэлгэцийн од Фан Бинбин хэдэн сарын турш олны нүднээс далд байж байгаад саяхан ил гарахдаа Хятадын Коммунист нам, ард түмнээс уучлал гуйсан юм.

 Тэрээр $130 саяын татварыг энэ онд багтааж нөхөн төлөх нөхцөлтэйгээр шийтгэлээс мултарсан гэгдэж байгаа. Фан Бинбиний нэг дүрд нь тоглосон “Air Strike” кино ирэх долоо хоногт нээлтээ хийх байсан юм.

Гэвч Хятадын найруулагч Шяо Фэн өөрийн сошиал хуудсанд 8 жилийн турш бүтээсэн кино нь дэлгэцэнд гарах боломжгүй болсныг бичжээ. Гэхдээ тэр энэ явдлыг бууж өгсөн хэрэг биш гэж тайлбарласан байна.

Түншүүд болон фэнүүдээсээ уучлал гуйсан Шяо Фэн киноны нээлтээ хийх өдрийг шинээр зарлах эсэхээ хэлээгүй юм.

Түүний мэдэгдлийн дараа Хятадын төрийн төв хэвлэл Глобал Таймс “Air Strike” киноны нээлт ямар нэг шалтгаангүйгээр цуцлагдсан тухай мэдээлжээ.

Фан Бинбиний татварын хэргээс үүдэлтэйгээр Хятадын энтертайнмент ертөнцийнхөн бүхэлдээ доргиод байгаа. Бээжингийн эрх баригчид энэ оныг дуустал нуусан татвараа сайн дураар төлбөл шийтгэхгүй гэдгээ нийт уран бүтээлчдэд зарласан юм. Мөн энэ оны дундаас эхлэн тайз дэлгэцийн одуудын нэг уран бүтээлээс олох орлогын хэмжээг хязгаарлах журам хэрэгжиж байна.