Өчигдөр буюу Ням гарагийн орой Оросын Антон Шкаплеров, Америкийн Скот Тингл, Японы Норишиге Канай нар сансарт 168 хоног ажилласны дараа эх дэлхийдээ амжилттай газарджээ.

Тэдний суусан газардагч бүхээг Казахстаны талд буусан байна. Бүхээгнээс эхэлж гарч ирсэн Шкаплеров Москвад хүргэгдэх бол дараа нь гарч ирсэн Тингл, Канай нарыг АНУ-ын Хьюстонд хүргэж, эрүүл мэндийн үзлэгт оруулах юм.

Энэ аялалын баг удахгүй ОХУ-д эхлэх хөлбөмбөгийн ДАШТ-ий эхний тоглолтын бөмбөгийг сансраас авч ирсэн гэнэ. Уг бөмбөгөөр зургаадугаар сарын 14-нд Москвад болох ДАШТ-ий анхны тоглолтыг эхлүүлнэ гэж ТАСС агентлаг мэдээлжээ.

Гэхдээ FIFA энэ тухай албан ёсоор мэдээлээгүй байгаа юм.

Сансрын нисэгчдээс АНУ-ын Тингл анх удаа сансарт аялсан байна. Харин Японы нисэгч Канай өнгөрсөн нэгдүгээр сард өөрийн биеийн өндрийг жингүйдлийн улмаас есөн сантиметрээр нэмэгдсэн тухай андуурч зарлан дуулиан тарьж байв.

Сүүлд тэр уг мэдээллийг залруулж, үнэн хэрэгтээ 2 см өссөнөө мэдэгдсэн юм. Сансрын нисэгчдийн бие татах хүчгүй орчинд 3 хувь орчмоор сунаад, дэлхийд буцсаны дараа эргэж хэвийн хэмжээнд хүрдэг тухай NASA тайлбарлаж байв.

Тэдний ажиллаж, амьдарч байсан Олон Улсын Сансрын Станцыг (ОУСС) Оросууд зохион бүтээсэн бөгөөд 1998 оноос хойш 28,000 км/цаг хурдтайгаар дэлхийг тойрон аялж байдаг юм. Хэдийгээр ОХУ, Өрнөдийн хоорондын харилцаа гүнзгий хямраад байгаа ч ОУСС-ыг хамтран ашигласаар байна.

Эх сурвалж: AFP