Ажиллах хүч хомсдолтой байгаагаас Япон улсын засгийн газар 2025 он хүртэл нийт 500,000 орчим ажилчин гадаад орнуудаас авахаар төлөвлөжээ.

Уг шийдвэр зургаадугаар сарын дундуур боловсруулж дуусгах ерөнхий сайд Шинзо Абэгийн шинэ эдийн засгийн бодлогын баримт бичигт тусгагдсан байна. Шийдвэртэй холбоотой хуулийн өөрчлөлтүүдийг ирэх намар парламентаар хэлэлцүүлэх юм.

Гадаад ажилчид Японд таван жилийн хугацаанд хөдөө аж ахуй, барилга, зочид буудал, асрах үйлчилгээ, тэнгисийн хөлөг онгоцны үйлдвэрлэл гэсэн таван салбарт ажиллах юм байна.

Тэднээс мэргэжлийн ур чадварын, мөн япон хэлний шалгалт авах ажээ. Харин Япон улсын гадаад ажилчдыг бэлтгэх дадлагажигчийн хөтөлбөрт хамрагдсан хүмүүс шалгалтаас чөлөөлөгдөж, 10 хүртэл жил ажиллах боломжтой гэнэ.

Дүрвэгчдийн хөлд дарагдахаас болгоомжилсон эрх баригчид ажиллах хугацаанд хатуу хяналт тавьж, ажилчдыг гэр бүлтэйгээ Японд байхыг хориглохоор болжээ.

2017 онд Японд 1.28 сая гадаадын иргэн амьдарч байгаа нь 2008 оны 480,000-аас хоёр гаруй дахин нэмэгдсэн тоо юм байна. Үүний 29 хувь нь Хятад, 19 хувь нь Вьетнам, 12 хувь нь Филиппин, 9 хувь нь Бразил, 5 хувь нь Балбын иргэд байгаа ажээ.

Дайны дараа бий болсон их төрөлтийн (baby boomers) үеийнхэн тэтгэвэрт гарч эхэлснээр Японд ажиллах хүчний ноцтой хомсдол үүсч эхэлсэн юм.

Эх сурвалж: Kyodo News