Эмч нарын суултад МҮЭХ-ны ерөнхийлөгч Х.Амгаланбаатар, дэд ерөнхийлөгч С.Эрдэнэбат, Ерөнхий нарийн бичгийн дарга Г.Адъяа нар нэгдлээ.

МҮЭ-ийн холбооны ерөнхийлөгч Х.Амгаланбаатар, "МҮЭ-үүдийн тэмцэл хэдхэн хоногийн өмнө бус 4 жилийн өмнө эхэлсэн. Хөдөлмөр, нийгмийн зөвшлийн гурван талт хэлэлцээрээр цалин хөлс нэмэгдүүлэх саналыг гурвалсан гэрээний хүрээнд гарган тавьсан. Дөрвөн жил дэндүү урт хугацаа. Үе үеийн Засгийн газрын туйлын хариуцлагагүй ажилласны горыг өнөөдөр бид харж байна" гээд эв нэгдэлтэй, хуулийн дагуу тэмцэхийг уриалж буй.

Суултад оролцогчдын зүгээс УИХ-ын дарга М.Энхболд, Ерөнхий сайд У.Хүрэлсүх, Төсвийн болон НББСШУ-ны байнгын хороод, Хөдөлмөрийн сайд С.Чинзориг, Сангийн сайд нарт хандсан шаардлага дахин гаргасныг ЭМАҮЭХ-ны дарга Б.Мягмар танилцуулаад Засгийн газрын хэрэг эрхлэх газрын дэд даргад өгөв. 
Төрийн үйлчилгээний ажилтнуудын цалин хөлсийг 2018 оны хоёрдугаар улиралд багтаан 50-иас доошгүй хувиар нэмэгдүүлэх асуудлыг төсвийн тодотгол хийх замаар шийдвэрлэхийг тус шаардлагад онцолсон байна.