Ш.ПҮРЭВДАВАА: МӨНГӨ ТӨГРӨГ НЬ ОЛДВОЛ ЗАСАЖ ЯНЗЛАХ Л БАЙХ ДАА

Хөвсгөл аймгийн Цагаан-Үүр сумын эв дүй, ур хийц муутайхан нэгэн хөшөө сүүлийн хэд хоногт олон нийтийн сүлжээний шүүмжлэлийн гол бай болж байна. Энэ хөшөөнөөс болж хөвсгөлчүүд хүмүүст нэлээд их шоглуулж, төсвийн мөнгө идэж уусан, хэрэггүй зүйлд татвар төлөгчдийн мөнгийг зарцууллаа гэх мэт янз бүрийн л хардлагад өртөж буй.

Уг хөшөөг 2011 онд тус аймгийн уугуул н.Даваадорж гэх залуу нутгийнхаа 80 жилийн ойн баярт зориулж, өөрийн хөрөнгөөр хэдэн залуучуудаар хийлгэжээ. “Урлагийн модернист урсгал талаас нь Уйлган голынхоо гурван аваргын бүх шинжийг эл хөшөөндөө шингээж албаар ингэж бариулсан юм” хэмээн хөвсгөлчүүд хөшөөгөө өмөөрч байгаа юм.

Гэтэл шогч нэгэн  “Энэ арай биш ээ. Модернист ч гэлээ будаач, будаач гэхэд сахлаа будав гэж... Урлаг шүү дээ, модернист гэхэд гарын дүйтэй хүүхэд баримлын шавраар ийм юм хийчихдэг. Ямар ч урлагийн мэдрэмжгүй барималч сонгож дээ” хэмээж буй юм.

Цагаан-Үүр сумын Уйлган голын хөвөөнөөс Монгол Улсын гурван аварга төрсөн бөгөөд эл нутгийг монголчууд бөхийн өлгий нутаг гэж ярьцгаадаг. Тиймээс нутгийн иргэн сайхан сэтгэл гаргаж, сумынхаа ойд зориулан энэ хөшөөг бүтээлгэхээр захиалга өгсөн нь ойлгомжтой.

Харин гүйцэтгэгч хэдэн нөхдүүд “нүглийн нүдийг гурилаар хуурна” гэдэг шиг нутаг орноо гэсэн хүний сэтгэлийг хүндэтгэж үзэлгүй олны доог тохуу болохоор зүйл хийсэн нь харамсалтай.

Уйлган голын гурван аваргын хөшөөг хэзээ янзалж өнгө зүсийг нь сэргээх талаар Цагаан-Үүр сумын Засаг даргын орлогч Ш.Пүрэвдаваагаас тодрууллаа. Тэрбээр “Энэ хөшөө 2011 онд баригдсан юм. Манай сумын нэг залуу 80 жилийн ой болохтой холбогдуулан өөрөө хөрөнгө гаргаж, гүйцэтгэгчээ авчраад бариулсан хөшөө байгаа юм.

Энэ хөшөөнд зориулж ямар нэгэн хөрөнгө мөнгө гаргасан зүйл байхгүй гэдгийг хэлмээр байна. Манай сумын төсвийг шалгаад үзнэ биз дээ. Уйлган голын гурван аваргынхаа хөшөөг бүтээхдээ олонд зориулаагүй, бөхийн өлгий нутаг гэсэн утгаар нь босгосон юм аа. Саяхан нэг хүн ийм хөшөө Хөвсгөл аймгийн Цагаан-Үүр суманд байдаг талаар олон нийтийн сүлжээнд тавьсан байна лээ. Үүнийг харсан хүмүүс нэлээд их шуугиж, шүүмжилсэн.

2021 онд Цагаан-Үүр сум байгуулагдсаны 90 жилийн ой болно. Тэрнээс өмнө мөнгө төгрөг нь олдвол засаж янзлах л байх даа. Энэ хөшөөг бүтээхийн тулд сумын захиргаанаас ямар нэгэн хөрөнгө мөнгө гаргаад сумын удирдлагууд идэж уусан юм байхгүй ээ гэдгийг дахин хэлмээр байна” гэсэн хариулт өглөө.

СОНИРХУУЛАХАД: Монголчуудад 1032 морины хөшөө, 538 бөхийн хөшөө, 341 төр нийгмийн нэрт зүтгэлтнүүдийн хөшөө, хонь ямааны 1652, аргаль янгирын 123, үхэр тэмээний хөшөө 756, Чингис хааны 27, Өэлүн эхийн 11, нохойны 231, эвтэй дөрвөн амьтны 26, тарваганы 25 ширхэг хөшөөтэй гэж тэмдэглэгдсэн байна. Хэрэв монголчууд хөшөө дурсгал босгосноороо хөгжин цэцэглэдэг байсан бол дэлхийн нэлээд хөгжилтэй орны тоонд орох байсан болов уу.