2018-03-30
Япон улсын Засгийн газар Умард Солонгосын хямралд гарч байгаа өөрчлөлтүүдийн талаар хэлэлцээ хийхээр Ерөнхий сайд Абэ Шинзо болон АНУ-ын ерөнхийлөгч Дональд Трамп нарын хооронд дээд хэмжээний уулзалт зохион байгуулахаар төлөвлөж байна. Ерөнхий сайд Шинзо Абе-гийн мэдэгдсэнээр засгийн газар нь Бээжинд болсон уулзалтын талаар мэдээлэл цуглуулж, дүн шинжилгээ хийж байгаа, ойрын үед Ким Жон Ун, Си Зиньпин нарын уулзалтын талаар Хятадаас мэдээлэл авахаар зорьж байгаа аж. Япон улс Америк, Умард Солонгосын хооронд анх удаа болохоор төлөвлөгдөж буй дээд хэмжээний уулзалтыг угтаад Япон-Америкийн түншлэлийг дахин нотлох үүднээс 4 дүгээр сарын 18нд Флоридад Абэ, Трампнарын уулзалтыг зохион байгуулахаар төлөвлөж байна.
Хэрвээ хоёр тал тохиролцвол Японы ерөнхий сайд Шинзо Абе-гийн хувьд АНУ-ынерөнхийлөгч Дональд Трамптай зургаа дахь удаагаа уулзана гэсэн үг юм. Уулзалт болсон тохиолдолд Абэ Умардыг цөмийн болон баллистик пуужингийн хөтөлбөрөө зогсоох хүртэл Пхеньянд үзүүлэх шахалтаа нэмэгдүүлнэ гэсэн өмнөх тохиролцоогоо дахин нотлох гэнэ. Үүнээс гадна тэрээр Умард Солонгост хулгайлагдсан гэх Япон иргэдийн асуудлыг шийдвэрлэхэд АНУ-тай хамтран ажиллах боломжийг эрэлхийлэх, Вашингтоноос тогтоосон гангийн импортын татвараас Японыг чөлөөлүүлэх давхар зорилготойгоор Трамптай уулзахаар төлөвлөж байна. Мөн Япон улсын засгийн газар хоёр талд дээд хэмжээний уулзалт хийх хүсэлтээ Умард Солонгосын Засгийн газарт мэдэгджээ.
Японтой уулзалт хийх боломжийг Пхеньян судалж байгаа гэж Японы "Асахи" сонины өнөөдрийн дугаарт мэдээлсэн байна. Тус сонинд мэдээлснээр Умардын удирдагч Ким Жон УнЯпонтой дээд хэмжээний уулзалт хийх боломжийг судлах чиг үүргийг эрх баригч Хөдөлмөрийн намын удирдлагуудад өгчээ. Японы Засгийн газар олон жилийн өмнө Умардад хулгайлагдсан гэх Япон иргэдийн асуудлыг хэлэлцэхээр Ким Жон Ун-тай уулзалт хийх сонирхорхолтой байгаагаа энэ сарын дундуур илэрхийлсэн юм. Умард Солонгосын засгийн газар цөмийн зургаан талт хэлэлцээрт багтдаг орнууд, БНСУ, АНУ, БНХАУ, ОХУ, болон Япон улстай тус тусад нь дээд хэмжээний уулзалт хийх боломжийг судалж байгаа тухай Өмнөд Солонгосын хэвлэлд мэдээлснийг ч Японы "Асахи" сонин иш татсан байна.
Эх сурвалж: MNB.MN
ЦАГ АГААР
°C/°C
°C/°C
°C/°C
Төстэй мэдээнүүд