Нийслэлийн Засаг дарга бөгөөд Улаанбаатар хотын захирагч С.Батболд өнөөдөр Буриад Улсын Төрийн тэргүүн Цыденов Алексей Самбуевичтэй уулзлаа. 

Хотын дарга С.Батболд  хэлэхдээ “Эрхэм хүндэт Цыденов Алексей Самбуевич тантай анх удаа уулзаж, танилцаж байгаадаа баяртай байна. Улаанбаатар хотод  тавтай зочилж, бидний хамтын ажиллагаа шинэ эхлэл тавина гэдэгт итгэлтэй байна. Улаанбаатар Улаан-Үд хотууд нь 1996 онд хамтран ажиллах санамж бичгийг анх байгуулсан түүхтэй. Энэ хугацаанд олон талт хамтын ажиллагаа  хөгжсөөр байна. Улаанбаатар хотын даргын хувьд Улаан-Үд хотод ажлын айлчлал хийж, Хотын дарга А.М.Голковтой албан уулзалт хийсэн. Түүнчлэн тус хотын 350 жилийн ойн арга хэмжээнд оролцож, залуучуудын чуулганд ч манай хот өргөн бүрэлдхүүнтэй оролцсон юм. Монгол Улс, ОХУ-ын хооронд 2014 оноос хойш харилцан визгүй зорчдог болсноос хойш аялал жуулчлал хөгжиж, иргэдийн зорчих нь ч нэмэгдсэн. Ингэснээр талуудын эдийн засаг, аялал жуулчлал, соёлын салбарын хамтын ажиллагаа идэвхитэй хөгжүүлэх үүд хаалга нээгдсэн гэж бодож байгаагаа тэрээр илэрхийллээ.

Буриад  Улсын  Төрийн тэргүүн А.С.Цыденов хэлэхдээ ”Улаанбаатар хотын даргатай ажил хэрэгч уулзалт хийж байгаадаа талархаж байна. Өмнө нь хувийн болон ажлын шугамаар танай хотод ирж байсан. Надад ажиглагдсан нэг зүйл бол Улаанбаатар хот жилээс жилд өнгөө засч, үзэсгэлэнтэй хот болж байгаа явдал юм.  Энэ удаад айлчлалын бүрэлдэхүүнд бизнесийн салбарын олон төлөөлөгчдийг багтаасан. Түүнчлэн хөдөө аж ахуй, аялал жуулчлал, ой модны үйлдвэрлэл, байгальд хоргүй экологи түлш үйлдвэрлэгч болон эрчим хүчний салбарынхан  Улаанбаатар хотод хүрэлцэн ирсэн. Улаан-Үд хотын нисэх онгоцны  буудал нь олон улсын тавдугаар зэрэглэлтэй. Улаанбаатар хотоос Сөүл, Токио, Манжуурын чиглэлд шууд нислэг хийдэг нисэх онгоцнууд манай хотод ямар нэгэн зөвшөөрөл, хүнд сурталгүйгээр транзит нислэг хийх боломжтой юм. Ингэснээр зорчигч тээврийн урсгал нэмэгднэ. Нөгөө талаар Монгол–Хятад-ОХУ-ын хооронд транзит тээврийг авто зам, төмөр замаар хөгжүүлж, цаашлаад чингэлэг тээвэрлэлтийг эрчимжүүлэх шаардлага байгааг онцоллоо.

Улаанбаатар хотын хамгийн тулгамдсан асуудал утаа, агаарын бохирдол гэдгийг Нийслэлийн Засаг дарга бөгөөд Улаанбаатар хотын захирагч С.Батболд хэлсэн. Буриад Улсын Төрийн тэргүүн Цыденов Алексей Самбуевич мөн утааны асуудлыг шийдвэрлэх шинэ техник технологи төсөл танилцуулна. Үзэсгэлэнтэй  Улаанбаатар хотыг утаанаас салгахад  ах дүү хотын хувьд хамтран ажиллана гэдгээ хэллээ. Цаашид эдийн засгийн хамтын ажиллагаагаа өргөжүүлж, боловсрол, аялал жуулчлал, соёл, эрчим хүчний салбарт хамтран ажиллах талаар ярилцлаа. Уулзалтанд  Буриад Улсын засгийн газрын Эдийн засгийн хөгжлийн асуудал хариуцсан орлогч И.И.Зураев, Хөдөө нутгийн хөгжлийн асуудал хариуцсан орлогч бөгөөд Хүнс, хөдөө аж ахуй яамны сайд Д.Ш.Чирипов, Хүнс, худалдаа, аж үйлдвэрийн сайд А.С.Мишенин зэрэг албаны хүмүүс оролцлоо гэж НЗДТГ-ын Хэвлэл, олон нийттэй харилцах хэлтсээс мэдээллээ.