2021 оны Элсэлтийн ерөнхий шалгалтыг өнөөдөр 10:00 цагт улс орон даяар Монгол Улсын түүхийн хичээлээр эхэлж байна. Энэ жилийн Элсэлтийн ерөнхий шалгалтад 40420 суралцагч бүртгүүлсэн байна. Тэдний хамгийн ахмад нь 58 настай иргэн ажээ.

Боловсрол, шинжлэх ухааны сайд Л.Энх-Амгалан "Ковидоос болоод зарим хүүхдүүд элсэлтийн ерөнхий шалгалтаа өгч чадахгүйд хүрвэл хоёр дахь удаагийн шалгалтыг зохион байгуулна" хэмээн мэдэгдэж байсан юм. Үүнийхээ дагуу Боловсрол, шинжлэх ухааны яам уг шалгалтыг хэзээ зохион байгуудахаа төлөвлөжээ. Тус яамнаас "Элсэлтийн ерөнхий шалгалт болох наймдугаар сарын 19-22-нд ковид-19 халдвар авсан шалгуулагчдаас есдүгээр сарын 2-5-ны өдрүүдэд шалгалт авна" гэж мэдээллээ.

Мөн "Элсэлтийн ерөнхий шалгалтын үед нэг ангид 12-15 шалгуулагч байх бөгөөд шалгалтын байр бүрд сэжигтэй шалгуулагчдаас шалгалт авах тусгаарлах өрөөг бэлтгээд байна. Сэжигтэй шалгуулагч гэж тухайн өдөр 37-оос дээш хэмийн халуунтай байгаа сурагчдыг хэлнэ" гэлээ.