Эхнэрийнхээ амийг хөнөөгөөд даатгалын их хэмжээний төлбөрийг нь авсан эрийг АНУ-ын шүүх нэгдүгээр зэргийн хүн амины хэрэгт буруутгаж, яллахаар болсон тухай Умард Каролина мужийн даатгалын алба өчигдөр мэдээлжээ. Шүүх хурал өнгөрсөн Баасан гарагт болсон байна.

Сувилагч мэргэжилтэй, 35 настай Жошуа Ли Хансакер эхнэрийнхээ хоол хүнсэнд нүдний дусаалгын шингэнийг их хэмжээгээр хийн хордуулж, амийг нь хөнөөсөн болохыг мөрдөгчид тогтоосон байна.

Түүний эхнэр, хоёр хүүхдийн эх, цэцэрлэгийн багш, 32 настай Стэси Робинсон Хансакер 2018 оны есдүгээр сарын 23-нд нас барсан бөгөөд үхлийн шалтгааныг нь гадны нөлөөгүй гэж дүгнэж байжээ.

Эхнэрээ нас барсны дараа Жошуа даатгалын байгууллагаас $250,000-ын төлбөр авсан байна. Тэрээр задлан шинжилгээ хийх хүсэлтийг хүлээж авалгүйгээр талийгаачийн шарилыг чандарлуулж байжээ.

Сүүлд энэ оны тавдугаар сард даатгалын төлбөрийг хууль бус аргаар авсан байж болзошгүй хэргийг дахин шалгаж эхэлсэн байна. Энэ мөрдлөгийн явцад донорын байгууллагад хадгалуулсан Стэси Робинсон Хансакерын цусыг шинжилж үзжээ. Ингэхэд түүний цуснаас нүдний дусаалгын найрлагад ордог тетрахидрозолин хэмээх бодис их хэмжээгээр илэрсэн байна.

Ийм бодис хүний биед ихээр орвол зүрхний ажиллагааг зогсоох аюултайг мөрдөгчид олж тогтоожээ. Улмаар Жошуа Хансакерыг байцаахад тэр эхнэрийнхээ амийг зориуд хөнөөснийг хүлээн зөвшөөрсөн байна.

Талийгаачийн цусан дахь тетрахидрозолин зөвшөөрөгдөх хэмжээнээс 30-аас 40 дахин өндөр байжээ.

эх сурвалж ikon.mn