2019-06-17
ХОНКОНГ /СЯНГАН/. /TASS/. Ням гарагт Хонкогт болсон жагсаалд өмнөх эсэргүүцлийн ажиллагаануудаас хамгийн олон буюу 2 сая орчим хүн оролцжээ. Ийм мэдээллийг эсэргүүцлийн ажиллагааг зохион байгуулагч “Хүний эрхийн төлөөх иргэний фронт”-оос өгсөн бол цагдаа нарын мэдээлснээр, 338 мянган хүн оролцсон байна.
Энэ удаагийн жагсаал тайван болж өнгөрсөн бөгөөд шөнө дунд хүртэл үймээн самуун дэгдээгүй байна. Олныг хамарсан жагсаалд оролцогчид цагдаа нартай сөргөлдөөгүй бөгөөд илэрхий өдөөн хатгасан үйлдэл хийгээгүй аж. Жагсагчид автобусууд болон түргэн тусламжийн машинууд явах замыг чөлөөлж өгч байжээ.
Хонконгийн гүйцэтгэх засаглалын тэргүүн Кэрри Лам ням гарагийн орой хийсэн мэдэгдэлдээ, гэмт хэргийн сэжигтнийг шилжүүлэн өгөх тухай хуулийн төслийг дэмжих оролдлого хийснээс үүдэлтэй хурц хямрал үүсгэсэнийхээ төлөө иргэдээсээ уучлалт хүсжээ. "Засгийн газрын ажил нь олон нийтийн дунд сөргөлдөөн, маргааныг үүсгэн, олон хүний урмыг хугалж, гонсойлгосон" гэдгийг тэрбээр ил тодоор хүлээн зөвшөөрсөн байна.
Эсэргүүцэл дагуулсан хуулийн төслийн хэлэлцүүлгийг түр зогсоосныг Хонконгийн эрх баригчид бямба гарагт мэдэгдсэн боловч энэ нь жагсагчдын төлөвлөгөөнд нөлөөлөөгүй байна. Тэд шинэ хуулиас бүрмөсөн татгалзахыг шаарджээ.
ЦАГ АГААР
°C/°C
°C/°C
°C/°C
Төстэй мэдээнүүд