Саудын Арабын угсаа залгамжлах хунтайж Мохаммед бин Салманы удирддаг Хөрөнгө оруулалтын сан Английн “Ньюкасл” клубыг 300 сая паундаар өчигдөр худалдан авлаа. Ингэснээр “Ньюкасл” клубт асар их хэмжээний хөрөнгө оруулалт хийх нь тодорхой болоод байна.

Английн “Манчестер Сити”-гийн эзэн Шэйх Мансураас 10 дахин их хөрөнгөтэй тул Мохаммед бин Салман “Ньюкасл” клубыг богино хугацаанд өрсөлдөх чадвар сайтай, шилдэг хөлбөмбөгчидтэй баг болгох бүрэн боломжтой юм.

Клубыг худалдан авах гурван талт хэлэлцээрт Саудын Арабын талыг төлөөлөн оролцсон Аманд Стэйвли “Өнөөдөр бол “Ньюкасл”-ын төлөө зүрх нь цохилдог хүн бүрийн баярын өдөр. Клубын ирээдүйн тухай бодохоор сэтгэл сэргэж, баясч байна. Бид удаан хугацааны турш өрсөлдөх чадвар сайтай, хамгийн том ялалтын төлөө тэмцэж чадах хэмжээний багийг бий болгоно. Бид Английн Премьер лигийн шилдгүүдийн тоонд эргэн багтах өдөр ирлээ” хэмээн мэдэгджээ.

Саудын Арабын Хөрөнгө оруулалтын сан жил хагасын өмнө “Ньюкасл”-ыг худалдан авах саналаа албан ёсоор хүргүүлсэн ч Английн Премьер лигийн удирдлага татгалзсан хариулт өгсөн юм. Татгалзах болсон үндсэн шалтгаан нь Саудын Арабад Катарын beIN Sports телевизийн албан ёсны эрхийг нь авсан Премьер лигийн тоглолтуудыг хулгайн замаар цацдаг байсанд оршино. Тэгвэл энэхүү асуудлыг хунтайж Мохаммед бин Салман шийдэж, Саудын Арабад Катарын beIN Sports-ийн шууд дамжуулалтыг цацах эрхийг албан ёсоор худалдан авсан юм байна. Ингэснээр “Ньюкасл”-ыг худалдан авах “ногоон гэрэл”-ийг асаажээ.

Одоо “Ньюкасл” клубыг дэлхийн хамгийн шилдэг, ирээдүйтэй гэх хөлбөмбөгчдөд ихээхэн хэмжээний цалин амлаж, толгой дараалан худалдан авна гэсэн хүлээлт байгаагийн зэрэгцээ мөн сайн дасгалжуулагчтай болно гэж фанатууд болон мэргэжилтнүүд үзэж байна.

Саудын Арабын угсаа залгамжлах хунтайж Мохаммед бин Салманы хөрөнгийг 320 тэрбум ам.доллар гэж Форбес тооцоолжээ. Энэ хөрөнгө нь Саудын Арабын Эзэн хааны гэр бүлийн хөрөнгө ч гэж ойлгож болох юм.