Монголын үндэсний кино урлагийн зөвлөл, Кино гүүр хөгжлийн холбоо хамтран зохион байгуулж буй “Хархорум” олон улсын кино наадам амжилттай болж шилдгүүдээ шалгарууллаа.

Тус наадмын Шилдэг уран сайхны киногоор жүжигчин, найруулагч Б.Амарсайханы бүтээл “Эргэж ирэхгүй намар”  кино шалгарчээ. Энэхүү киноны зохиолыг Т.Бум-Эрдэнэ нь “Түнтүүлэй” өгүүллэгээс сэдэвлэн бичжээ.

Наадмын хүрээнд Венец, Пусан, Берлин, Токиогийн кино наадмын болон Оскарын шагналт найруулагчдын буюу 15 орны шилдэг 22 уран сайхны болон баримтат киног толилуулсан билээ. Харин уралдаанд нийт есөн орны 14 кино өрсөлдсөн юм.

“Хархорум” олон улсын кино наадмыг энэ жил анх удаагаа Хүний эрхийн түгээмэл тунхаглал батлагдсаны 75 жилийн ойг тохиолдуулан зохион байгуулсан гэдгийг зохион байгуулагчид онцолсон юм. Энэ хүрээнд “Хүний эрх-75” буюу хүний эрх, эрх чөлөөг сурталчлах нийтлэг ойлголт болоод сэдэвчилсэн мэдлэгийг таниулах бөгөөд кино урлагаар дамжуулан хүний эрхийг дээдлэх, зөв хандлагыг төлөвшүүлэх зорилготой аж.

Шилдэг бүрэн хэмжээний уран сайхны кино - "Эргэж ирэхгүй намар" МУСК
Хүний эрхийн агуулга бүхий шилдэг бүтээл - Францын "Амьтдын ертөнц" кино
Шилдэг баримтат кино - Америкийн "Шилжилт" кино тус тус шалгарлаа

Гэрэл зургийг Г.Өнөболд

Эх сурвалж: gogo.mn