“Instagram” нийгмийн сүлжээ зурганд гоо сайхны мэс заслын нөлөө оруулдаг шүүлтүүрийг хориглох шийдвэр гаргажээ. Хэрэглэгчдийн сэтгэцийн эрүүл мэндэд үзүүлэх сөрөг нөлөөг бууруулах зорилгоор ийм арга хэмжээг авах болсон байна.

“Plastica”, “FixMe” зэрэг хүний гадаад дүр төрхийг сайжруулж харагдуулдаг шүүлтүүрүүдийг “Instagram” өнгөрсөн 8 дугаар сард гаргажээ. Эдгээрийн тусламжтай хэрэглэгч арьсаа татуулах, уруулаа томруулах, хөмсөг хамрын хэлбэрийг засаж янзлах дүрсний үйлчилгээг ашиглан зургаа танигдахын аргагүй болтол өөрчлөх боломжтой байжээ. Иймэрхүү шүүлтүүрийг ашиглах нь гоо сайхны мэс засалд ороход хүргэдэг байна.

“Бид бодлогоо эргэн харж, бидний бүтээсэн шүүлтүүрүүд хүмүүст зөвхөн эерэг сэтгэгдэл төрүүлээсэй гэж хүсэж байна” хэмээн “Instagram” компанийн мэдэгдэлд дурджээ.