850 гаруй жилийн түүхтэй, Францын хамгийн алдартай түүхэн дурсгалуудын нэг болох Парисын дарь эхийн сүм түймэрт шатсан билээ. Тус улсын Ерөнхийлөгч Эммануэль Макрон Нотр Дамыг таван жилийн дотор сэргээн босгоно гэдгээ мэдэгдсэн.

Франц даяар хандивын аян өрнөж, хувь хүмүүс болон бизнесийн байгууллагууд энэ үйлсэд хөрөнгө амласаар байна. Байгалийн үнэт өвийг хамгаалдаг “Du Patrimoine” сан олон улс даяар хөрөнгө босгох ажиллагаа өрнүүлж байгаа аж.

“Japan times” агентлагийн мэдээлснээр томоохон байгууллагууд болон бизнесмэнүүд Нотр Дамыг сэргээн засварлах ажилд 24 цагийн дотор 700 сая еврог /790 сая ам.доллар/ хандивлахаа амлажээ.

“Kering” компанийн захирал Франсуа-Хенри Пино сүмийн засварт 100 сая евро хандивлана гэдгээ хамгийн эхэнд зарласан. Үүний дараа тансаг зэрэглэлийн бараа борлуулдаг “LVMH” компанийн захирал Францын тэрбумтан Бернар Арно энэ үйлсэд 200 сая еврог амласан юм.

Францын L’Oreal-ийн өв залгамжлагч Беттенкурт-Мейерийн гэр бүл ч мөн 200 сая еврог амласан бол тус улсын томоохон газрын тосны компани Total сүмийн засварт 100 сая евро хандивлана гэв.

Түүнчлэн Францын агаарын тээврийн компани сэргээн босголтын ажилтай холбоотой нислэгийг үнэгүй явуулж өгөхөөр болсон гэнэ. Үүнээс гадна АНУ-ын Apple компанийн гүйцэтгэх захирал Тим Кук сүмийн засварт мөнгө хандивлана гэдгээ твиттер хуудаснаа бичжээ.

ОХУ-ын Ерөнхийлөгч Владимир Путин сүмийг сэргээн босгоход шинжээчдээ явуулан тусламж үзүүлэхдээ таатай байна гэв. Их Британи болон Испанийн эрх баригчид мөн адил сүмийг сэргээх үйлсэд хувь нэмрээ оруулна гэдгээ идэрхийлжээ.

Эх сурвалж: BBC, Japan times