Энэ долоо хоногт чуулганаар хэлэлцэх асуудлын жагсаалт гарчээ. Ингэхдээ баасан гаригийн чуулганы хуралдааны хамгийн төгсгөлд ҮАБЗ-ийн мэдээллийг хаалттай сонсохоор болсон байна. Энэ нь чухам ямар мэдээлэл вэ гэдэг нь олны анхаарлыг ихэд татаж байна. Тэгвэл эх сурвалжуудын мэдээлж байгаагаар, хаалттай мэдээллээрээ АТГ-ын удирдлагуудын асуудлаар мэдээлэл өгнө гэнэ. 

Тодруулбал, АТГ-ын одоогийн удирдлагуудыг чөлөөлөх асуудал мөн шинээр томилогдох дарга нарын мэдээллийг өгөх юм байна. 

АТГ-ын удирдлагуудыг солих асуудал УИХ-ын гарт бий. Тодруулбал, Авлигын эсрэг хуулийн 22.1-д АТГ-ын дарга, дэд дарга нарын бүрэн эрхийг түдгэлзүүлэх санал эсвэл огцруулах бол ҮАБЗ-ийн саналыг УИХ-д оруулна. ҮАБЗ-өөс АТГ-ын удирдлагуудыг чөлөлөх, огцруулах санал гаргавал саналаа УИХ-д хүргүүлнэ. Улмаар УИХ хэлэлцээд ҮАБЗ-өөс гаргасан зөвлөмжтэй санал нэгдэж байвал чөлөөлж, огцруулна. Хэрвээ санал нийлэхгүй бол АТГ-ын удирдлагууд үлдэх хуулийн заалттай юм. Гэхдээ энэ удаад УИХ Ерөнхийлөгчийн саналыг хүлээн авч, АТГ-ын удирдлагуудыг чөлөөлөх нь нэгэнт тодорхой болоод байгаа билээ. 

Ерөнхийлөгч Х.Баттулгын зүгээс АТГ-ын удирдлагуудыг солих хүсэлтээ хэдийнээ гаргачихсан. Бүр тэдний оронд томилох хүмүүсийн нэрийг өргөн бариад амжсан ч өнгөрсөн сарын 28-ны өдөр саналаа эгүүлэн татсан. Энэ нь ч тодорхой байсан. Учир нь түүнийг АТГ-ын даргаар Даваанямын Даваа-Очирыг, дэд даргаар Жанжаагийн Батсайханыг тус тус томилуулах саналаа хүргүүлэхэд л энэ бол халхавч хэмээн хүмүүс жиг жуг хийлцэж байв. Олны үг ч ортой байсныг Ерөнхийлөгч баталж, тэдний нэрийг эгүүлэн татаж, бүрэн эрхийнхээ хүрээнд УИХ-д дахин санал оруулах шийдвэр гаргаснаа УИХ-ын дарга Г.Занданшатарт албан бичгээр мэдэгдсэн юм.

Харин одоогийн байдлаар нэрсээ өргөн бариагүй ч Ерөнхийлөгчийн оруулж ирэх дараагийн хүмүүс хэн бэ гэдэг асуулт олны анхаарлыг татаж байна. Ерөнхийлөгч Х.Баттулгын зүгээс АТГ-ын даргаар Сийлэнгийн Ганбат, Зандраагийн Дашдаваагийн нэрийг УИХ-д өргөн барихаар бэлдэж байгаа гэх мэдээлэл бий. 

С.Ганбат нь өдгөө хурандаа цолтой, Дотоодын цэргийн штабын даргаар ажилладаг. Эрүүгийн цагдаагийн газрын ахлах төлөөлөгчөөс тасгийн дарга, дэд дарга, ЭЦГ-ын дарга хүртэл дэвшин ажиллаж байжээ. Ойр тойрныхон хүмүүс түүнийг ажилдаа зарчимч, шударга хэмээн үнэлдэг аж. 

Гэвч тэрбээр удахгүй генерал цолоо авахаар хүлээж байгаа бөгөөд бас бус шалтгаанаар АТГ-ын даргын албан тушаалаас татгалзсан гэх мэдээлэл байна. 

Тиймээс З.Дашдаваагийн нэрийг АТГ-ын даргад ярьж байна. З.Дашдаваа нь Хэнтий аймгийн Цагдаагийн газарт Эрүүгийн төлөөлөгч, Баянгол дүүргийн цагдаагийн хэлтэст  хэрэг бүртгэгч, эрүүгийн төлөөлөгч, Эрүүгийн цагдаагийн газарт эрүүгийн төлөөлөгч, Говь-Алтай аймгийн Засаг даргын дэргэдэх цагдаагийн хэлтэст  Эрүүгийн тасгийн дарга, Сонгинохайрхан дүүргийн Засаг даргын дэргэдэх Цагдаагийн хэлтэст Эрүүгийн тасгийн дарга, Цагдаагийн ерөнхий газрын Дотоод хяналт, шалгалт, аюулгүй байдлын  хэлтэст тасгийн дарга, хэлтсийн дарга, Хууль сахиулахын их сургуулийн Цагдаагийн сургуулийн захирал, Сүхбаатар дүүрэг дэх Цагдаагийн хоёрдугаар  хэлтсийн даргаар тус тус томилогдон ажилласан, одоо Цагдаагийн ерөнхий газрын Дэд даргаар ажилладаг юм байна.