Өсвөр насныхан болон залуу үеийнхэн трап чиглэлийн хөгжмийн урсгалыг сонгон сонсох болсон. Үүнийг дагаад энэ чиглэлээр уран бүтээл туурвидаг залуу уран бүтээлчид ч олширсон. Гэвч эдгээр уран бүтээлчдийн дууны өнгө аяс, үг нь өсвөр үеийнхэнд сөргөөр нөлөөлж болзошгүй байдал үүсгэж байгаа нь эцэг, эхчүүдийг хүүхдүүдийнхээ сонсож буй дуу, даган дууриаж буй бүхэнд анхааралтай хандахыг шаардаж эхэллээ.

Учир нь хүүхдүүдийн дунд Don Dior хэмээх уран бүтээлийн нэрээр алдаршсан дуучин Д.Мөнхтулга хар тамхины хэргээр шалгагдаж, шүүхээс ял авсан байна. Тэрбээр Сүхбаатар дүүргийн нутаг дэвсгэрт байрлах “Гэрэлт гудамж”-нд явж байхдаа хар тамхи хэрэглэж байгаад цагдаад баригдсан бөгөөд энэ талаараа шүүхийн танхимд дэлгэрэнгүй мэдүүлжээ.

Тэрбээр “2018 оны есдүгээр сарын 1-ний өдөр гэрээ цэвэрлэж, хоолоо хийчихээд утсаа оролдоод байж байхад, хуучин үерхэж байсан Энхжингийн фэйсбүүк хаяг нь нээлттэй байхаар нь Энхжинг хотод ирсэн байж магадгүй гэж бодоод гэрээсээ гарсан. Энхжин хотод ирэхээрээ ихэвчлэн "Гэрэл гудамж"-нд явж байдаг болохоор би тийшээ очсон. "Гэрэлт гудамж"-нд ирээд автомашины зам хаасан хэсэгт явж байхад үл таних гурван залуу ирээд "Юу байна, хөгшөөн. Чи гоё дуулдаг шүү. Би чиний дууг байнга сонсдог. Завтай бол хамт тамхилаач" гэхээр нь би мэндлээд, гар барьсан. Тэр үед надад тамхи өгөхөөр нь аваад таттал тамхи биш өвс байсан. Тэгэхээр нь тамхи өгсөн залууд буцааж өгөөд, өөрийнхөө тамхийг татсан. Тэр үед нөгөө залуу "Надад халаас алгаа. Чи энэ зүйлийг цүнхэндээ түр хийчихээч" гээд өгөхөөр нь би гялгар ууттай зүйлийг үзэж шалгалгүй цүнхэндээ хийчихсэн юм. Яг тэр үед цагдаа нар ирж, "Цэнхэр үстэй залуу нааш ир дээ" гээд намайг ганцааранг нь дуудсан. Очсон чинь "Яагаад тамхи татаад байгаа юм бэ, дагаад яв" гээд Сүхбаатар дүүргийн цагдаагийн хэлтэс рүү авч явсан. Ингээд миний цүнхэнд цагдаа нар үзлэг хийж, нөгөө залуусын өгсөн гялгар ууттай зүйлийг гаргаж ирэн, хар тамхи хэрэглэсэн байна гэж үзсэн. Би тэр залуусын өгсөн гялгар ууттай зүйлсийг хар тамхи гэдгийг нь мэдээгүй” хэмээжээ.

Түүнийг саатуулан шалгасан цагдаагийн алба хаагчдын хэлж байгаагаар Д.Мөнхулгаас архи согтууруулах ундаа үнэртээгүй боловч илтэд мансуурсан байдалтай байсан учир шалгасан аж. Д.Мөнхтулга цагдаагийн хэсэгт ирэх үедээ өөрийгөө хар тамхи хэрэглэсэн гэдгээ хүлээн зөвшөөрсөн ба хэргийг шалгах явцад гэм буруутай нь тогтоогдсон учир улсын яллагч түүнд Эрүүгийн хуулийн тусгай ангийн 20.7 дугаар зүйлийн 1 дэх хэсэгт зааснаар гэм буруутайд тооцуулж, 1 жилийн хугацаагаар нээлттэй хорих байгууллагад эдлүүлэх санал гаргажээ.

Харин шүүгдэгч Д.Мөнхтулга болон түүний өмгөөлөгч нарын зүгээс "Гэм буруугаа хүлээн зөвшөөрсөн, гэмшиж байгаа, уран бүтээл хийдэг дуучин, дүүтэйгээ амьдардаг, шивээсний урлаг сонирхдог, анх удаа гэмт хэрэг үйлдсэн бөгөөд эрүүгийн хариуцлага, зарчимд нийгэмшүүлэх гэж байгаа тул хорих ял оногдуулахгүйгээр тэнсэж өгнө үү" гэсэн санал гаргасан байна. Улмаар шүүхээс дээрх саналыг хүлээн авч, Д.Мөнхулгад нэг жилийн хорих ял оноож, тэнсэн харгалзахаар болжээ.