Экс Ерөнхийлөгч Ц.Элбэгдорж эргэн ирэлт увайгүй, намбагүй, жудаггүй байв. ЗГХЭГ-ын дарга Л.Оюун-Эрдэнэ  өнгөрөгч амралтын өдрүүдэд Эрдэнэт үйлдвэртэй холбоотой материалуудтай нэг бүрчлэн танилцаж, холбогдох албан тушаалтнуудад үүрэг өгөв. Гэтэл үүнээс хоёрхон хоногийн дараа Ерөнхийлөгч асан Ц.Элбэгдорж цөөн хэдэн сэтгүүлчидтэй хамт гэнэт гараад ирэв.

Нөгөө л тогтсон заншлаараа улс орны эрх ашгийг нэн тэргүүнд тавих хэрэгтэй гээд л урсгаж өгч байгаа харагдах. Түүний уран үгийг өмнө нь сонсож байгаагүй нэгэн бол Монгол Улсад үлдсэн сүүлчийн шударга хүн гэж хармаар...

Харамсалтай нь экс Ерөнхийлөгч өөрт ашигтай байх бүх зүйлсийг улсын орны эрх ашиг гэх танил үгээр халхлан нийтэд хүргэдэг. Иймээс ч түүний энэ удаагийн мэдээлэл дайран дээр давс нэмнэ гэгч болов. Найман жилийн хугацаанд  Элбэг хүүгийн үгэнд “хууртсан” ард түмэн түүнийг таатай хүлээж авсангүй. Цахим орчинд экс Ерөнхийлөгчийн шууд бичлэгийг үзэж дургүйцлээ илэрхийлсэн бүх хүнийг тэрбээр худалдагдсан хэмээн буруутган, доромжилж суув. 

Ингэтлээ чичлүүлэн барин гарч ирсний шалтгаан нь хэд хэд. Үүний нэг нь Эрдэнэтийн 49 хувь. Эрхэм Ерөнхийлөгч Эрдэнэтийн 49 хувийн асуудал өндрөө авах бүрт ёс юм шиг гарч ирдэг. Өмнө УИХ-ын чуулганы хуралдаанд өөрийн биеэр орж, хүний өмчийг булааж авах гэж байна хэмээн өндөр дуугаар “зандарсан”. Тухайн үед 49-ийнхний талын улаан хамгаалагч болон ийнхүү парламентын индэр дээр “том дуугарсан.” 

Тэгвэл энэ удаа ЗГХЭГ-ын дарга С.Оюун-Эрдэнэ Эрдэнэтийн 49 хувьтай холбоотой баримтуудыг нягтална гэх мэдээлэлтэй зэрэгцэн ийнхүү гарч ирлээ.

Мэдээж энэ бол экс Ерөнхийлөгчийн эмзэг цэг. Учир нь түүнд Эрдэнэтийн 49 хувийг төрд өгөхгүйгээр хамгаалж үлдэн, хэдэн үеэрээ идээд барахгүй хөрөнгөнд эзэн суух том мөрөөдөл бий.