2018 онд нисэх онгоцны ослын улмаас амиа алдсан хүний тоо 2017 онтой харьцуулахад ихээхэн өссөн тухай Нисэх хүчний аюулгүй байдлын сүлжээний газраас мэдээллээ.

Тус байгууллагын тайлангаас үзэхэд өнгөрсөн онд нисэх онгоцны ослын улмаас 556 хүн амиа алдсан байна. 2018 оны аравдугаар сард Индонезид хамгийн аймшигт онгоцны осол болж 189 хүний амийг авч одсон билээ. Харин 2017 онд зорчигч тээврийн нэг ч онгоц осолдоогүй тул дэлхийн түүхэнд хамгийн аюулгүй жилээр шалгарч байв.

Нидерландад төвтэй Нисэх хүчний аюулгүй байдлын сүлжээний газрын мэдээлснээр 2018 онд 15 аймшигт нисэх онгоцны осол гарсан байна. Үүнд:

• Индонезийн Lion Air компанийн Boeing 737 MAX нисэх онгоцны осол /189 хүн амиа алдсан/
• Кубад тавдугаар сард болсон осол /112 хүн амиа алдсан/
• Ираны Загрос ууланд хоёрдугаар сард гарсан осол /66 хүн амиа алдсан/
• Непалын Катманду онгоцны буудалд гуравдугаар сард болсон осол /51 хүн амиа алдсан/ орж байна.

Тус байгууллагын захирал Харро Рантер хэлэхдээ “Ерөнхий дүр зургаар харвал сүүлийн 20 жилийн хугацаанд энэ салбарын аюулгүй байдлыг хангах ажиллагаанд ахиц дэвшил гарсан. Тухайлбал ослын түвшин өнгөрсөн 10 жилийн хугацаанд өөрчлөгдөөгүй бол 2018 онд 39 аймшигт осол гарах байсан. 2000 он гэхэд л нийт 64 томоохон осол гарч байсан юм” гэжээ.

НИСЭХ ОНГОЦНЫ ОСОЛ БУУРСААР БАЙНА

Эх сурвалж: BBC