2018-10-17
Авлигын хэргээс зугтахын тулд өөрийгөө үхсэнд тооцуулсан Украины гэмт этгээд Францын шилтгээнд амьдарч байгаад баригджээ.
Францын цагдаа нэрийг нь нууцалж байгаа этгээдийг 4.6 сая еврогийн үнэтэй хөрөнгө эзэмшиж байсныг нь илрүүлсэн байна. Түүний эзэмшилд 12 дугаар зууны феодалын шилтгээн, Rolls-Royce Phantom хуучны ховор загварын автомашин, үнэт эдлэлүүд, Сальвадор Далигийн гурван уран зураг багтаж байжээ.
Европол нэрийг нь нууцалж, одоогоор “Шилтгээний Хаан” хэмээн нэрлэж байгаа этгээдийг аравдугаар сарын 5-нд Францын Дижон хотын ойролцоо баривчилсан байна.
Уг мэдэгдэлтэй зэрэгцэн Украины ерөнхий прокурорын газар өөрийн иргэн Дмитро Малиновскийг шилжүүлж өгөхийг Францын талаас өчигдөр хүсчээ.
Шилтгээнийг 3 сая еврогоор худалдаж авсан сэжигтэй гүйлгээг өнгөрсөн нэгдүгээр сараас эхлэн Францын цагдаа шалгаж эхэлсэн байна. Уг гүйлгээг Люксембургт бүртгэлтэй компаниас хийсэн байжээ.
Гэтэл энэ компанийн эзэн нь Украинд их хэмжээний авлигын хэрэгт сэжиглэгдсэн хүн байсныг тогтоосон байна. Улмаар Франц, Люксембург, Украины эрх баригчид хамтран ажиллаж, нас барсанд тооцогдож байсан уг этгээд амьд төдийгүй, Францад тансаг амьдралд умбаж байсныг олж илрүүлжээ.
Украин улсад 2014 онд ерөнхийлөгч Виктор Януковичийн дэглэмийг сольсон ч авлига улам газар авсан юм. ОУВС тус улсын эрх баригчдыг авлигатай тэмцэх амлалт өгсөн нөхцөлд $17.5 тэрбумын зээл тусламж үзүүлэхээр хүлээж байгаа.
Сэжигтэн Малиновский нь 2015 онд 12 сая еврог хулгайлж, офшор дансанд шилжүүлсэн юм байна. Транспаренси Интернэшнл байгууллагын зарласан авлигын индексээр Украин улс 130 дугаарт Сьерра Леоне, Мьянмар улсуудтай зэрэгцэн жагсдаг. Энэ нь ОХУ-аас бусад Европын бүх улсуудаас доогуур үнэлэгдсэн гэсэн үг юм.
Эх сурвалж: Bloomberg
ЦАГ АГААР
°C/°C
°C/°C
°C/°C
Төстэй мэдээнүүд