Мэргэжлийн сумогийн Аки башёгийн 11 дэх өдрийн барилдаанд ёкозүна Хакухо М.Даваажаргал озэки Такаясүг давсанаар ганцаараа нэг ч унаагүйгээр тэмцээнийг тэргүүлж эхэлсэн. Тэгвэл тухайн өдөр Германы нэрт хөлбөмбөгч, дэлхийн аварга Лукас Подольски аваргатай уулзаж, шигшээ багийнхаа өмсгөлийг дурсгал болгон бэлэглэжээ.

Лукас Подольски Японы Жей лигийн “Виссел Кобэ” багт тоглож буй юм.

Хакухо М.Даваажаргалын хувьд энэ башёд хоёр том амжилт шинэчлэн тогтоох боломжтой байсны нэгийг нь биелүүлчихээд байна. Тэрбээр ёкозүна цол хүртсэнээсээ хойш 800 дахь даваагаа авч өөр сумочдын эвдэхэд хэцүү нэгэн гайхалтай тоонд хүрсэн. Тэгвэл одоо дахин гурван удаа давбал Макүүчи буюу дээд зиндаанд 1000 давсан анхны бөх болж түүхэнд мөнхрөх юм.

Подольски  Хакухотой ийнхүү уулзсан бол Асашёорюү Д.Дагвадоржтой 2006 оны дэлхийн аварга, Италийн алдарт хөлбөмбөгч Алессандро Дель Пьеро уулзахаар санал тавьсан талаар Д.Долгорсүрэн зааны бага хүү олон нийтийн сүлжээндээ тэмдэглэсэн байсан.