Энэ зун чөлөөт агент болоод байсан Кливленд Кавальерс багийн ЛеБрон Жеймс буурь сэлгэж Нэгдсэн улсын баруун эргийн Лос-Анжелес Лейкерс багтай дөрвөн жилийн 154 сая ам.долларын гэрээ байгуулсан талаар Ням гаригт /2018.07.01/ албан ёсоор зарлажээ. Klutchsports твиттер хуудаснаа гарсан мэдээллээр НБА-н гурван удаагийн аварга, гурван удаагийн финалын үнэ цэнэтэй тоглогч, дөрвөн удаагийн улирлын үнэ цэнэтэй тоглогч, 14 удаагийн бүх-одод тоглогч Л.Жеймс Лос-Анжелес Лейкерс багтай дөрвөн жилийн гэрээ байгуулжээ.

“Хаан” Жеймс энэ улирлыг өндөрлүүлээд багаасаа явах нь тодорхой байсан. Түүний дараагийн очих баг нь ч бараг тодорхой байсан. Ийнхүү Л.Жеймс төрөлх мужийнхаа багт үүргээ гүйцэтгээд явж байна. Леброн 2003 оноос хойш лигт тоглохдоо Кливленд Кавальерс болон Миами Хит багуудад тоглосон бөгөөд 2006 оноос хойш тогтмол плэй-оффт шалгарсан байдаг. Тэрээр Миами Хит багтай 2012, 2013 онд, төрөлх Кливленд Кавальерс багтайгаа 2016 онд Ларри О’Брайны цом буюу аваргын цомыг өргөсөн.