УИХ-ын гишүүн Д.Гантулга, Д.Мурат нарын бүрэн эрхийг түдгэлзүүлэх хүсэлтийг Улсын Ерөнхий прокурорын газраас УИХ-д хүргүүлсэн. Улмаар энэ асуудлыг УИХ-ын чуулганаар хэлэлцсэн ч тэдний бүрэн эрхийг түдгэлзүүлэх шаардлагагүй хэмээн хүлээн аваагүй юм. Гэсэн ч Ерөнхий прокурор М.Энх-Амгалан "Бүрэн эрхийг нь түдгэлзүүлээгүй ч үргэлжлүүлэн шалгаж үнэн мөнийг олно" гэсэн юм. Мөн Д.Мурат, Д.Гантулга нарын бүрэн эрхийг зайлшгүй түдгэлзүүлэх шаардлагатай гэсэн саналыг эмэгтэй гишүүд илэрхийлсэн. Тэгвэл энэ талаар УИХ-ын гишүүн Д.Оюунхоролоос тодрууллаа.

-УИХ-ын гишүүн Д.Мурат, Д.Гантулга нарын бүрэн эрхийг түдгэлзүүлэлгүй авч үлдлээ. Энэ асуудалд та ямар байр суурьтай байна вэ?

-Ичиж байна. МАН-ын бүлэг энэ асуудлаар дахин хуралдаж, асуудлыг шийдэхээр болсон. Мөн эмэгтэй гишүүд нэгдэж, Монгол Улсын Ерөнхийлөгчөөр хориг тавиулахаар албан бичиг хүргүүлэх гэж байна.

-Өөрөө санал хураалтад оролцох нь хэр ёсзүйтэй асуудал вэ?

-Үнэхээр ёсзүйгүй асуудал. Хүчингийн хэрэгт холбогдсон бол энэ асуудлаа хууль хяналтын байгууллагаар шалгуулаад тогтоолгоод ирэх хэрэгтэй. Гэтэл УИХ хаацайлж үлдээх шаардлагагүй байсан. Өөрөө өөрөө санал хураалтад оролцох ашиг сонирхлын хуулиар хориойтой.