Өнгөрсөн даваа гаригт Кремлийн ордны Андревскийн их танхимд ОХУ-ын Ерөнхийлөгч Владимир Путин тангаргаа өргөсөн билээ. Түүний тангараг өргөх ёслолын арга хэмжээнд бөмбөрцгийн хэдэн арван мянган зочид төлөөлөгч хүрэлцэн очиж, түүнд баяр хүргэсэн талаар дэлхийн хэвлэлүүд онцолж байна.

Зочдын дунд нэгэн содон зочин байсан нь Холливудын нэрт жүжигчин Стивен Сигалын эхнэр Батсүхийн Эрдэнэтуяа байжээ. Тэрбээр шаргал өнгөтэй монгол дээрээ гоёж очсон нь олны анхаарлыг ихэд татсан байна.

Б.Эрдэнэтуяа ОХУ-ын Ерөнхийлөгчийн тангараг өргөх ёслолын арга хэмжээнд оролцохоор монгол дээлээрээ гоёсон талаараа өөрийн цахим хуудастаа бичжээ. Тэрбээр “Монгол дээлээрээ гоёсоор Кремлийн ордонг зорьж явна. “Агуу их хүмүүн” хэмээх тодотголыг алдар нэрийнхээ өмнө мөнхөлж оршоосон хүмүн энэхэн хорвоод хэдий олон билээ!

Усан цэрэг аавтай, үйлдвэрийн ажилчин ээжтэй эгэл жирийн хөвүүн өдгөө алдар суугаа мандуулсан Агуу Их Хүмүүн болж, алтан дэлхийд хүлээн зөвшөөрөгдсөн Дэлхийн Их Удирдагч болжээ! Олон олон дайн дэгдсэн ороо бусгаа энэ цагт алтан дэлхий хөрвөж, амьтай бүхэн зовнин түгшиж байхад Агуу Их Орос гүрнийг Монголд минь ээлтэй энэ хүмүүн удирдаж байгаа гэж бодоход сэтгэл цаанаа л амрах...

Үнэхээр дэлхийн геополитикийн хүчний тэнцвэрийг Орос оронгүйгээр тогтоон барихын аргагүй, дэлхийн улс төрийн бодлогыг энэ хүний оролцоогүйгээр чиглүүлэхийн аргагүй мэт!

Ханийн минь дотны анд, хөрш их гүрний минь төрийн тэргүүн Владимир Владимирович Путины Орос Улсын Ерөнхийлөгчийн тангараг өргөх ёслолд оролцох энэхүү эрхэм урилгыг хүлээн авсандаа туйлын их баяртай байна. Ийм хүндтэй завшаан, нэр төрийн хэрэг хүний амьдралд хэдий олон тохиолдох билээ” хэмээн бичжээ.