УИХ дахь Ардчилсан намын бүлэг өнөөдөр гурван асуудлаар мэдээлэл хийлээ. Үүний нэг нь байгалийн баялагийн хуваарилалтын асуудлыг хэлэлцэнэ гэсэн юм. Тодруулбал, АН-ын бүлэн Ерөнхийлөгч Х.Баттулгатай хамтарч “Эрдэнэс Тавантолгой” ХК-ийн төрийн мэдлийн 86 хувийг 100 хувь иргэдэд шилжүүлэх хуулийн төслийг боловсруулж дууссанаа  мэдээлэв. Уг хуулийн төслийг ирэх долоо хоногт Ерөнхийлөгч УИХ-д өргөн барихаар болжээ.

УИХ-ын гишүүн З.Нарантуяа

-“Эрдэнэс Тавантолгой” ХК-ийн 1072 хувьцааг иргэн бүр эзэмшээд, удаж байгаа ч хувьцааныхаа өгөөжийг хүртэж чадахгүй байгаа.

“Эрдэнэс Тавантолгой”-н 14 хувийг эзэмшдэг хэр нь ногдол ашгийг хүртдэггүй, компанийн үйл ажиллагаанд оролцож чаддаггүй, өөрсдөө удирдах дээд байгууллагад нь сонгогдож чаддаггүй. Одоо энэ компани борлуулалтын болон бусад гэрээг ашиггүйгээр хийдэг муу засаглалтай компанийн үлгэр жишээ болоод ажиллаж байна. Тиймээс бид энэ компанийг нийтийн өмчлөлтэй компани болгон хуулийн зохицуулалтыг шинэчилж, энэ хуулийг батлуулахаар ажиллаж байна” гэлээ.

Эх сурвалж: OLLOO.MN