"Apple" компанийнхан  ухаалаг гар  утасныхаа хамгийн  сүүлийн загвар болох "Iphone X"-ийн үйлдвэрлэлийг зогсоож  магадгүй  байна. Энэ нь  тус загварын  ухаалаг утасны  эрэлт муу  байгаатай  холбоотой гэнэ. Энэ  тухай  "KGI Securities"-ийн  шинжээч  Мин Чи Куо  хэвлэлд  өгсөн  ярилцлагадаа мэдээлжээ.

"Apple" компани энэ онд 25-30 сая "Iphone X"  дэлхийн зах зээл  дээр худалдаалагдана гэж тооцоолж  байсан. Гэвч  шинжээч мэргэжилтнүүд энэ тоо 18  саяас  хэтрэхгүй гэж  үзэж  байна.  Энэ нь шинэ  загварын ухаалаг утасны эрэлт дэлхий даяар тэр дундаа гол хэрэглэгчид нь байдаг  Хятадад муу  байгаатай  холбоотой  гэж тайлбарлаж  байна. Хятадуудын хувьд дэлгэцийн дээд хэсэгт хуваалт гаргасан нь нүүр царайгаар танигч болон урд талын камер байрлах ашигтай талбайг  багасгасанд  сэтгэл  хангалуун  бус байгаагаа илэрхийлцгээж  байгаа аж. 

Шинжээчид "Iphone X"-ийг "Apple"-ийн түүхэнд зах зээлд  гаргаад удаагүй байхдаа үйлдвэрлэлийг нь зогсоосон анхны ухаалаг утас болж магадгүй гэж үзэж  байна.  Ухаалаг утасны  энэ шинэ загвартай холбоотой шуугиант мэдээлэл өмнө  нь ч  бас тарж  байсан.  Тодруулбал,  программист Жонатан Левин  тус ухаалаг  утсанд нэвтэрч файлын системд  нь нэвтрэх  чадалтай  Либериос  программ бүтээснээ мэдэгдэж байсан  билээ.