​БНАСАУ-ын дээд удирдагч Ким Чен Ун шинэ оны баярын үгэндээ "Удахгүй болох гэж буй Пёнчаны өвлийн олимпийн наадамд БНАСАУ тамирчдаа илгээн оролцуулах сонирхолтой байгаа бөгөөд энэ асуудлаар Хойд, Өмнөдийн эрх баригчид яаралтай хэлэлцээ хийх бололцоо бий" гэлээ.

Ким Чен Ун төв телевизээр тавьсан илтгэлдээ "Энэ онд БНАСАУ тунхагласны 70 жилийн ойгоо тэмдэглэх болно. БНСУ мөн удахгүй Пёнчаны өвлийн олимпын наадмыг зохион байгуулах гэж байгаа тул 2018 он Хойд, Өмнөд хоёр талд бүгдэд нь ихээхэн ач холбогдолтой жил юм. БНСУ-д удахгүй эхлэх өвлийн олимпийн наадам бол үндэстний байр суурийг харуулах сайхан боломж мөн. БНАСАУ энэ удаагийн өвлийн олимпийн наадам амжилттай явагдахыг чин сэтгэлээсээ хүсч байна" гэж мэдэгдлээ.

Ким Чен Ун "БНАСАУ төлөөлөгчдөө томилох зэрэг аливаа шаардлагатай арга хэмжээ авахыг зорьж байгаа бөгөөд Хойд, Өмнөдийн эрх баригчид энэ асуудлаар яаралтай хэлэлцээ хийж магадгүй. Удам угсаа холбоотой нэг үндэстний хувьд элэг нэгтнүүдийн зохион байгуулах үйл ажиллагааг туслан дэмжих нь зүй ёсны ажил юм" хэмээлээ.