“Авто тээврийн үндэсний төвийн захирал П.Дэлгэрнаран Эрээн Замын-Үүд хооронд зорчдог улс хоорондын зорчигч тээврийн автобусандаа 1000 ширхэг тарваганы арьс хууль бусаар хил нэвтрүүлж байгаад Эрээний талд 2017 оны 12-р сарын 06-ны  өдөр саатуулагдлаа” гэсэн мэдээлэл өнгөрсөн амралтын өдөр твиттер, сошиалаар цацагдав.

Харин эл мэдээллийг Автотээврийн үндэсний төв ТӨҮГ-аас ор үндэслэлгүй мэдээлэл гэлээ. Тус газрын эх сурвалж мэдээлэхдээ “Манайхаас Архангай аймгийн ард иргэд болон баруун бүсэд зорчих иргэдийн тав тухтай байдлыг хангахуйц “АВТОТЭЭВРИЙН ТӨВ”-ийн шинэ барилгаа өнгөрсөн амралтын өдрүүдэд ашиглалтад оруулсан. Тус автовокзал, тээврийн хяналтын үзлэгийн төвийг Автотээврийн үндэсний төв өөрийн хөрөнгөөр маш богино хугацаанд стандартын дагуу барьж байгуулсан. Нээлтэд манай захирал өөрийн биеэр очсон. Харин яг одоо Зам тээврийн яаманд сайдын шуурхайд сууж байна” гэлээ.

Гэхдээ Дорноговь аймгийн Замын-Үүдээс БНХАУ-ын Эрээн хот руу улс хоорондын зорчигч тээвэрлэдэг автобус тарваганы арьс хууль бусаар гаргах гэж байгаад баригдсан нь үнэн бололтой. Тодруулбал Эрээний хэвлэл мэдээллийн хэрэгслүүдээр энэ талаар мэдээллэхдээ “Дорноговь аймгийн Замын-Үүдээс БНХАУ-ын Эрээн хот руу улс хоорондын зорчигч тээвэрлэдэг 5673 ДГО улсын дугаартай тээврийн хэрэгслээр /автобус/ 300 ширхэг тарвагны арьс нууж, улсын хил давуулж байгаад баригдсан хэрэг гарсан байна. Улмаар, БНХАУ-ын Эрээн хотын хилийн цэрэгт баригджээ” хэмээсэн байна. Тус автобус нь төрийн өмчит Авто тээврийн үндэсний төвийн бүртгэлтэй бөгөөд жолооч нь төрийн албан хаагч байсан аж.