Хойд Солонгост айлчилж байгаа НҮБ-ын улс төрийн хэрэг хариуцсан орлогч нарийн бичгийн дарга Жэффри Фелтман тус улсын удирдагч Ким Жон Унтай уулзаж чадалгүй буцахаар болжээ.

Фелтманы дөрвөн өдрийн айлчлал өнөөдөр дуусч байгаа боловч өчигдрийн байдлаар Ким Жон Ун түүнийг хүлээж авч уулзалгүй өнгөрсөн байна. Тэр зөвхөн Хойд Солонгосын гадаад хэргийн сайд Ри Ён Хо болон бусад албаны хүмүүстэй уулзаж, олон сэдвээр ярилцсан гэнэ.

Фелтман уг нь 2010 оноос хойш Пёньянд айлчилж байгаа НҮБ­-ын хамгийн дээд тушаалын хүн болж байгаа тул түүнийг Ким Жон Унд бараалхана гэсэн хүлээлт байсан юм.

Өнгөрсөн сард Ким Жон Ун Хятадын төрийн тэргүүний бие төлөөлөгч Сүн Таог мөн хүлээж авалгүй буцаасан нь хоёр орны хоорондын харилцаанд хүйтэн уур амьсгал бий болгож байв.

2015 онд Ким Жон Ун Хятадын тэргүүний өөр нэг элч болох Лю Юншанийг эрх баригч намын 70 жилийн ойгоор зочлоход нь уулзаж байсан юм. Харин сүүлд ирсэн элчийг хүлээж аваагүй нь Хойд Солонгосын Хятадад өгч буй сануулга юм гэж ажиглагчид үзэж байна. Хятад улс түүхийн турш байнга дэмжиж ирсэн Пёньяны дэглэмийн эсрэг олон улсын хориг арга хэмжээнд нэгдэх болсон нь үүнтэй холбоотой.

Сүүлийн жилүүдэд Ким Жон Унтай уулзаж чадсан цорын ганц гадаадын иргэн нь NBA-ийн тамирчин асан Дэнис Родмэн болоод байгаа юм.

Эх сурвалж: Korea Times