2017-11-30
Лхагва гарагт БНАСАУ-аас АНУ-д цохилт өгөх хэмжээний хүчин чадалтай, шинэ төрлийн тив алгасагч баллистик пуужинг амжилттай туршсан талаар БНАСАУ-ын алдарт хөтлөгч Ри Чун Хи үндэсний телевизээрээ дамжуулан зарлажээ. Лхагва гарагт шилжих шөнө Пёняны ойролцоо хөөргөсөн Хвасон-15 хэмээх тус пуужин нь Хойд Солонгосын туршсан хамгийн хүчтэй баллистик пуужинд тооцогдож байгаа юм. БНСУ-ын телевизийн мэдээлснээр пуужин 4,475 кмын өндөрт хөөрсөн бөгөөд 950 км зайг туулж 54 минутын дараа Япон тэнгист унажээ.
Сүүлд есдүгээр сарын 15-нд хийж байсан туршилтын пуужин нь Япон улсын дээгүүр өнгөрч байсан бол харин энэ удаагийнх Японы хойд эргээс 250 -зайд унасан гэж албаныхан мэдээлсэн байна. Харин Япон улсад хохирол учруулсан зүйл байхгүй байгаа талаар Японы Кёодо мэдээллийн агентлаг уламжилжээ.
БНАСАУ нь бусад улс орнуудын зүгээс үзүүлж буй хориг арга хэмжээг үл харгалзан цөмийн болон алсын тусгалт пуужингийн туршилтуудаа үргэлжлүүлсээр байгаа юм. Пуужингийн туршилт хийж байгаа гол зорилго нь АНУ-д цохилт өгөх хүчин чадалтай цөмийн цэнэгт хошуу бүхий пуужин гаргаж авах гэдэг дээр олон улс санал нэгтэй байсан ч богино хугацаанд ийм аюултай хэмжээнд хүртлээ ахиц дэвшилт гаргасан нь гэнэтийн явдал болж Өмнөд Солонгос болон Америк зэрэг улс орнуудыг багагүй цочирдуулаад авчээ.
“Хэрэв Хойд Солонгос улс тив алгасагч пуужингаа боловсронгуй болговол асуудал нэгэнт хяналтаас гарна гэж санаа зовниж байна” гэж БНСУ-ын ерөнхийлөгч Мүн Жэ Ин мэдэгдсэн байна.
Харин АНУ-ын ерөнхийлөгч Доналд Трамп Япон улсын ерөнхий сайд Шинзо Абэ нар Хойд Солонгост үзүүлэх хориг арга хэмжээгээ улам чангатгах шийдэлд хүрсэн бөгөөд БНХАУ-ыг ч мөн энэ асуудлыг шийдэх тал дээр арга хэмжээ авахыг уриалсан байна.
“Лхагва гарагт БНАСАУ-ын хөөргөсөн баллистик пуужин дэлхийн хаа ч хүрч чадахаар аюултай хэмжээнд очсоныг тэдний энэ удаагийн пуужингийн туршилт баталж байна. Энэ бол дан ганц ану болон БНСУ-ын аюулгүй байдалд заналхийлсэн үйлдэл биш харин дэлхий нийтийн энх тайван байдалд аюул заналхийлэл учруулсан үйл явдал боллоо” гэж АНУ-ын Батлан Хамгаалахын Сайд Жеймс Мэттис мэдэгджээ.
Харин БНАСАУ-ын зүгээс энэхүү үйлдэл нь АНУ-ын империалист үзэлтнүүдээс өөрсдийгөө хамгаалах зорилгоор авч хэрэгжүүлж байгаа арга хэмжээ хэмээн мэдэгдсэн бөгөөд улс орных нь эрх ашигт халдахгүй бол айх аюул байхгүй гэжээ. Түүнчлэн энх тайвныг дээдэлдэг орны хувьд дэлхийн амар амгалан байдлыг хадгалахын төлөө чадах бүхнээ хэмээн мэдэгдсэнийг BBC агентлаг уламжилсан байна.
ЦАГ АГААР
°C/°C
°C/°C
°C/°C
Төстэй мэдээнүүд