2017-11-17
Аюулгүй байдал гадаад бодлогын байнгын хорооны хурал 57.9 хувийн ирцтэй эхэлсэн. Хуралдаанаар Тусгай хяналтын дэд хорооны бүрэлдэхүүнийг өөрчлөх асуудлыг хэлэлцэв.
Өчигдөр /2017.11.16/ буюу Пүрэв гаригийн УИХ-ын чуулганы нэгдсэн хуралдаанаар Тусгай хяналтын дэд хорооны бүрэлдэхүүнийг өөрчлөх асуудлыг хэлэлцсэн ч Ардчилсан намын бүлэг нэг хоногийн завсарлага авсан. Учир нь тус намын бүлэг Л.Болд гишүүнийг Тусгай хяналтын дэд хороонд нэмж оруулах зорилгоор дэд хорооны квотын тоог нэмэх санал гаргасан бөгөөд Аюулгүй байдал гадаад бодлогын байнгын хороонд хүргүүлсэн. Тус байнгын хороо өнөөдөр энэ асуудлаар хуралдаж, АН-ын бүлгийн саналыг олонх дэмжив.
Ингээд Тусгай хяналтын дэд хорооны бүрэлдэхүүнийг хоёроор нэмж долоо болгох асуудлыг УИХ-ын чуулганд хүргүүлэхээр шийдвэрлэв. Дэд хорооноос гарсан хоёр гишүүний оронд УИХ-ын гишүүн Н.Номтойбаяр, Б.Энх-Амгалан нарыг дэвшүүлээд байсан бол ахиад нэмж хоёр гишүүн оруулахаар болов.
Ингээд хоёр квотын төлөө УИХ-ын гишүүн Д.Оюунхорол, Т.Аюурсайхан, Л.Болд нар өрсөлдсөн.
УИХ-ын гишүүн Ц.Мөнх-Оргил:
-О.Содбилэг дарга та УИХ-ын гишүүн Д.Оюунхорол, Т.Аюурсайхан нарыг дэд хороонд нэр дэвшүүлнэ гэдгээ намын бүлэгтэй зөвшилцсөн юм уу. Ардчилсан намын бүлэг дэд хорооны нэг квотыг авна гэж тохиролцсон юм биш үү. Хэрэв тийм бол Ардчилсан намын бүлэгт өгөх ёстой.
Аюулгүй байдал гадаад бодлогын байнгын хорооны дарга О.Содбилэг:
-Ардчилсан намын бүлэг есөн гишүүнтэй. Гишүүдийн тоонд харьцуулж тооцвол нэг квот хангалттай. Гэхдээ Ардчилсан намын бүлгээс гаргасан саналын дагуу дэд хорооны бүрэлдэхүүнийг нэмэхээр боллоо. Тэгэхээр хоёр квот дээр гурван хүн өрсөлдөнө. Санал хураалтыг өмнөх жишгийн дагуу нууцаар явуулах нь зүйтэй болов уу.
Байнгын хорооны даргын гаргасан горимын саналыг гишүүд 100 хувь дэмжиж, санал хураалтыг нууцаар явуулав. Санал хураалтаар УИХ-ын гишүүн Д.Оюунхорол 11, Л.Болд долоо, Т.Аюурсайхан таван гишүүний дэмжлэг авлаа.
Ингэснээр Д.Оюунхорол, Л.Болд Н.Номтойбаяр, Б.Энх-Амгалан нарыг Тусгай хяналтын дэд хорооны бүрэлдэхүүнд нэмж оруулах саналаа УИХ-д хүргүүлэхээр болж байна.
Дээрх асуудлыг өнөөдөр УИХ-ын чуулганаар хэлэлцэхээр товлосон. Гэвч Байнгын хороо асуудлаа нэгтгэж дуусаагүй байхад ажлын цаг дууссан. Тиймээс ажлын цаг дууссан тул чуулганы хуралдааныг эхлүүлсэн ч төд удалгүй өндөрлүүлсэн юм.
ЦАГ АГААР
°C/°C
°C/°C
°C/°C
Төстэй мэдээнүүд