2013 оноос хойш өөрийн гэсэн хичээлийн байргүй 3-4 сургуульд таран хичээллэж байсан 14-р сургуулийнхан удахгүй шинэ байрандаа орохоор болжээ.

Хичээлийн шинэ жил эхлэх гэж байгаатай холбогдуулан нийслэлийн Засаг дарга С.Батболд, Баянзүрх дүүргийн Засаг даргын үүрэг гүйцэтгэгч Т.Баясах нар албаны хүмүүсийн хамт 14 дүгээр сургуулийн засварын ажилтай танилцсан байна.

Тус сургуулийн барилгын ажил 90 орчим хувьтай явж байгаа бөгөөд ирэх сарын 10-ны дотор барилгыг бүрэн дуусгах төлөвлөгөөтэй.

Өнгөрсөн хичээлийн жилд тус сургуулийн

• бага болон 3-5 дугаар ангиуд “Шавь” цогцолбор сургуульд,
• 6, 7, 9-12 дугаар ангиуд 92 дугаар сургуульд,
• 8 дугаар анги нь 53 дугаар сургуульд хичээллэж байсан.

Харин тус сургуулийн 1500 хүүхдийн хүчин чадалтай шинэ байр ашиглалтад орсноор “Шавь” цогцолбор сургууль 3 ээлжээс гарч, 92, 53 дугаар сургуулийн ачаалал буурах юм хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ. 

Хо-Ши-Миний нэрэмжит Улсын тэргүүний үндэсний лаборатори 14 дүгээр сургуулийн багш, сурагчид өнгөрсөн жилээс эхлэн хэвлэл мэдээлэлд хандаж, улмаар жагсаал хүртэл зохион байгуулж байсан билээ. Тэгвэл тэд энэ хичээлийн жилдээ багтаан шинэ байрандаа хичээллэх боломжтой болох нь ээ.