ТӨРИЙН АЛБАН ХААГЧИЙН ЁС ЗҮЙН ДҮРЭМ, ЖУРМЫГ НОЦТОЙ 
ЗӨРЧСӨН ГЭСЭН БАЙНА

Саяхан МХЕГ-аас “Эрдэнэт үйлдвэр” ХХК-д шалгалт хийсэн байна. Тодруулбал, МХЕГ-ын нэгэн дарга болох С -ээр ахлуулсан ажлын хэсгийнхэн Орхон аймагт 10 хоног ажиллаж, “Эрдэнэт үйлдвэр”-т ажиллажээ. Хэд хоногийн өмнө энэхүү шалгалтын дүнгийн хурал МХЕГ-т болсон байна.

Тус хуралд Д.Эрдэнэбилэг тэргүүтэй Эрдэнэт үйлдвэрийн удирдлагууд оролцжээ. Энэ үеэр МХЕГ-ын дарга Д.Цагаанхүү “Эрдэнэт үйлдвэр”-т шалгалтаар очиж ажилласан байцаагчид үйлдвэрийн ажилчдын хоолноос идсэн талаар ярьж, хоолны мөнгийг шалгалтаар очсон байцаагчдын цалингаас суутгах болсноо мэдэгдсэн байна. Учир нь Мэргэжлийн хяналтын байцаагчдын Орхон аймагт албан томилолтоор ажиллах хугацааны хоолны мөнгө, буудлын хөлсийг гаргаж өгсөн тул “Эрдэнэт үйлдвэр”-ийг хохиролгүй болгохыг үүрэгджээ.

Д.Цагаанхүү хэлэхдээ “Төрийн нэр барьж шалгалтаар оччихоод үйлдвэрийн ажилчдын хоолноос идэж, ёс зүйгүй үйлдэл гаргалаа. Ингэснээр МХЕГ-ын байцаагчид Ашиг сонирхлын тухай хууль, Төрийн албан хаагчийн ёс зүйн дүрэм, журмыг ноцтой зөрчсөн байна. Үйлдвэрийн ажилчдын хоолноос идсэн байцаагчдын хоолны мөнгийг цалингаас нь суутгаж “Эрдэнэт үйлдвэр”-ийг хохиролгүй болго. Д.Эрдэнэбилэг захирал идсэн хоолны мөнгө шилжүүлэх дансны дугаарыг манайханд өгөөрэй” гэжээ.

Тус үйлдвэрийнхэн шалгалтаар ажилласан байцаагчдыг АБК-гийн хоолны газартаа үдийн хоолонд оруулж, тэд үйлдвэрийн ажилчидтай зэрэгцэн хооллосон нь ийнхүү асуудал дагуулсан байна. Түүнээс гадна МХЕГ-ын байцаагчид АБК-гийн хоолны газрыг 10 үзүүлэлтээр шалгахад нэгд нь зөрчил илэрчээ. Гэтэл МХЕГ-ын байцаагчид дээрх зөрчлийг нуун дарагдуулсан нь тодорхой болсон байна. Эх сурвалжийн мэдээлснээр, МХЕГ-ын байцаагчдын идсэн хоолны мөнгө “Эрдэнэт үйлдвэр”-ийн дансанд шилжин орсон аж.