"Эрдэнэс Тавантолгой” ХК-ийн Төлөөлөн удирдах зөвлөлийн 2021 оны дөрөвдүгээр сарын 20-ны өдрийн № 21/03 тоот тогтоолоор 2020 оны цэвэр ашгаас нэгж хувьцаанд 357 /Гурван зуун тавин долоо/ төгрөгний ногдол ашиг тараахаар байсныг өөрчилж, нэгж хувьцаанд 535 /Таван зуун гучин тав/ төгрөг буюу нийт 28.1 тэрбум төгрөгийг хувьцаа эзэмшигчиддээ ногдол ашиг болгон тараахаар болжээ.

Энэхүү ногдол ашиг авах эрхтэй хувьцаа эзэмшигчдэд 2021 оны дөрөвдүгээр сарын 21-ний өдрөөс эхлэн "ҮЦТХТ" ТӨХХК-иар дамжуулан ногдол ашиг тараахаар болсон талаар Монголын хөрөнгийн биржээс мэдээлэв.

“Эрдэнэс Тавантолгой” ХК-ийн бонд 24-36 сарын хугацаатай, нэг бүр нь 100 мянган төгрөг болон 100 ам.доллароор нэрлэсэн үнэтэй. Тус компанийн борлуулалт өсвөл 1072 хувьцаа эзэмшиж байгаа иргэнд ирэх ногдол ашиг ч мөн өсөх гэнэ.