Голдэн Стэйт Уорриорс болон Хьюстон Рокетс багуудын цувралын тав дахь тоглолт Оракл Аренад явагдлаа. Цуврал 2:2 тэнцүү байсан бөгөөд аль хожсон баг нь цувралыг 3:2 тэргүүлж маш том давуу талыг авах тоглолт юм.

Маш чухал тоглолтын эхний хагаст Голдэн Стэйт илт илүү тоглосон бөгөөд хамгийн ихдээ 22 онооны зөрүүтэйгээр тэргүүлж байлаа. Харин Рокетс гуравдугаар үеийн сайн тоглолтоороо эргэн ирж онооны зөрүүг арилгаснаар 72:72 харьцаатай дөрөвдүгээр үе эхэлсэн юм.

22 оноо аваад байсан Кэвин Дурант тоглолтын гуравдугаар үеийн дунд хэсэгт гэмтэл авч тоглолтыг чөлөөлж Уорриорсыг хүнд байдалд оруулсан ч түүнээс хойш Стефэн Көрри өөрийн тоглолтоо олж санаачлагыг гартаа авч байлаа.

Улмаар маш хүнд тоглолтын эцэст 104:99 харьцаатай Голдэн Стэйт Уорриорс хожиж цувралыг 3:2 тэргүүлж эхэллээ.

Клэй Томпсон 27 оноо, Стефэн Көрри 25 оноо 6 самбар 5 оновчтой дамжуулалт өгч багаа х хожилд хөтөллөө. Харин Рокетсоос Жэймс Харден 31 оноо, Эрик Гордон 19 оноо, ПЖ.Такер 13 оноо 10 самбар авсан ч боломжоо ашиглаж чадсангүй.

Цувралын зургаа дахь тоглолт Хьюстон Рокетсын талбайд Бямба гарагт явагдана. Рокетс хожвол цуврал 3:3 болж тэнцэнэ, харин Уорриорс хожвол Өрнөд бүсийн финалд шалгарсан эхний баг болох юм.